Проектот на Лаг Агро Лидер, „Mлади женски гласови на балканската рурална поезија“, чија главна цел е промовирање на активни млади авторки од руралните региони од Балканот и зајакнување на младите од руралните средини преку позитивни приказни, прифатен по втор пат за суб-грантирање во рамките на проектот „Регионална мрежа за културна разновидност“, финансиран од Европската Унија.

Благодарение на оваа поддршка, минатата година од печат излезе поетската книга „Мајка ми знае што се случува во градовите“ од српската авторка Радмила Петровиќ. Книгата, освен што постигна огромен успех и беше одлично прифатена од публиката, исто така имаше продонес во препознавањето на нови и моќни регионални поетски гласови од Балканскиот Полуостров.

Наскоро ќе биде испечатен и промовиран нашиот втор предлог во рамките на оваа едиција, односно стихозбирката „Dani punog mjeseca“ од српската авторка Витомирка Требовац. Книгата е во превод на Звонко Димоски.

Пишувањето на Требовац и нејзината животна приказна за тоа како почнала да пишува, несомнено ќе бидат инспиративни за младата публика: „Имавме селска библиотека, секогаш празна, отидов таму, а кога изнајмив книга, читав по пат за дома, додека одев по улицата. Читањето секогаш го гледав како нешто возбудливо. Често бев сама, а читањето беше мојот втор живот“.

Требовац досега ги има објавено поетските книгите „Сино во боја“ и „Сите дрвја, сите деца и сите велосипеди во мене“. Во издание на издавачката куќа ЛОМ неодамна излезе од печат нејзината трета поетска книга „Денови на полна месечина“.

Авторката вели дека секогаш пишува од/во некоја форма на движење, пешачење, јавање, од по патот. Таа ги собира впечатоците од по улиците, од нејзините патувања со велосипед, погледите на минувачите, чувствата кои ги буди мирисот на липите, односно искрено го набљудува животот. Нејзината поезија нè учи дека е неопходно постојано да се занимаваме со животот и затоа песните кои ги создава се пред сѐ за обичните нешта, секојдневните теми, секојдневните оплакувања и сл. Стихозбирката претставува концизна, логично составена и критички тонирана дискусија за основниот и комплексен теоретски проблем на когнитивната психологија, односно колку човекот е рационален во своите верувања и одлуки.